إبظلام الليل ياخويه اطلعت واتعثر ابهمي
أدور جثتك وينه يم جسمك لقيت امي
شفتها تلثم إلنحرك وابخدها الدمع يهمي
يريت إلّي انقطع نحري ويريت إلّي جرى دمي
عليك امعصبه للراس ودمعها بالوجد يهمي
ومن منحر ولدها احسين خضبت للشعر فاطم
ابدمك لصبغ إلشعري ودم نحرك دمه نحري
لداوي جرحك ابقلبي واغسلنه ابدموع العين
أجت زينب لعد أمها وعليها ألوت ابحسره
وكل وحده تجر ونه وتجابها ابأثر زفـره
وزينب تشكي حسرتها وحزنها وتخبر الزهره
علينا يمه لو شفتي إشلون اتعدى كل غاشـم
من وصلت لعد لحدود طلعنه امن الخيم فرهود
زلم واخيول من هجمت على اخيام الحرم صوبين
ييمه شوف هذا احسين بقى جثه بليا راس
ييمه ما بقت له روح ييمه امخمد الأنفـاس
وجسمه من بعد ذبحه ييمه بالخـيول انداس
وكل إلّي جرى اعلى حسين انظره والدمع ساجم
انا شفت الشمر يمه ينحره ويفغر ابدمه
عقب ما زلزل العسكر وافت اقلوبها ابلونين
ييمه اخيمنه حرقوها وحرمنه ضاعت ابهالـبر
وآنه ابوحشة الموقف ييمه ابهـمي اتعـثر
ظلام وليل وطفالي من الدهشه تشت وتفـر
وعدواني على ايتامي تشد وما شفت راحم
ييمه سحقو الأطفال ييمه مابقت لي حال
لمن شفت اطفالي اهجوم الخيل منسحقين
ابصدرها ضمت الزنب تصبرها وتسليها
تقلها يانظر عيني اهمومك عنـدي خليها
وجمر نيرانك ابقلبك ابوسط قلبي دبرديها
اني امك اليك اليوم تعنيت ابقلب هايـم
شفت كل ماجرى وما صار شفت يوم الي شبو النار
واعيالك بليا اشعور فرو خوف مذعورين
وفاطم بالحزن ظلت تنوح اعلى الولـي وتنعي
ينور العين وروح الروح إلك روحي اجت تسعي
مصابك والْجرى ابها اليوم نسـاتي ألم ضلعـي
وسهْم إلّي جسم قلبك قلبي يالولـد جـاسـم
كل اجراحه كل اصواب ابقلبي يالولد انصاب
ودلالي على امصابك ترى هو منحسم نصـين
يم جسمه اقعدت فاطم تقلب جسم ابنها حسين
وشافت صدره المكسور ودمه إلّي نزف صوبين
وشافت راسه لمصوب وقلبه إلّي انجسم نصـين
إلزمت فاطم صدرها ابجف وجف اعلى والوجه لاطم
منهو إلي قطع نحرك ياهو إلي هشم صدرك
ينور العين لمصابك ابدمعي لطفي نور العين