يبني لكبر هاك اخذ روحي وياك
يابني ضيعني زماني وبسهم فقدك عماني
آه يبني يالولد آه يبني
ابسهم فقدك هالدهر دولبني
آه يازهرة حياتي عمري بعدك ما أريده
ابكي والمثكول أبدا كل بكاويه ما تفيده
اني يوليدي ربيتك ابين الجفن والمحجر
افرشت عيني اليك امهاد وغطى بجفوني تدثر
ورويتك من وجد قلبي حليبي وليلي كنت اسهر
ومثل نبته ابمهب الريح اداريها لجل تـكـبر
وعقب ذاك التعب شتجازيني
حرمه بالطف يولدي اتخليني
واشلون امشي اليوم يبني بلياك
هالأمر يبني دهاني وبسهم فقدك عماني
آه يا شهقت حياتي الضاعت
اشلون هالأيام بيـه دارت
يبني كنت امله اعليك اتشيل حملي يوم كبري
ومن عقب موتي ابأيدك اتواري جسمي وسط قبري
ويوم إلكربله جينه وعلينه دارت العسكر
فقدتك يا عمد بيتي يكوكب ناظري اليزهر
يريت الطف خذت عمري ولا تنصاب يالأكبر
يريت السيف شق راسي ولا ظل راسك امطبر
هالمآسي ابفكرتي ما دارت
ابهالبلايه الي ابد ماصارت
ومن بعد ظلك ترضى امشي مع اعداك
والشمر ترضى يرعاني وبسهم فقدك رماني
قوم عاين حالتي يوليدي
أمل عمري ضاع وآنه اشبيدي
يبني قوم واشوف حالي دمعتي ابخدي جريه
آيست واخسرت عمري من شفت جسمك رميه
على بالي يمر كل يوم يوم الي طحت يا حيد
وعلى صدره ابو اليمه يحملك والدمع تبديد
على الدنيه العفى انادي وبعد ك هالعمر ما ريد
وجابك ليه بالخيمه ونار امصابه بيه اتقـيد
يبني هذا اليوم ابـد ما انساه
يمر دوم ابخاطري وما اسلاه
لاتظن يبني الوالده تنسى ذكراك
وانته مطبوع ابكياني وبسهم فقدك رماني
لو تشوف اقليبي يبني اشصاير
والفكر يا نور عيني طاير
يبني قلب امك ابآلام اشحال من تفـقد ولدها
يبني طول الليل ما نام اعيوني تتصورك عندها
يبني وشخصك اقبالي يلوح ابليلي وانهاري
اهيـم ابفكري واتردني ينور العين افكاري
على شخصك على طولك الوح ويزهي في داري
اصد للدار وانشدها ودمعي بالحزن جـاري
وين بدر الي يشـع ابنوره
اشلون صارت حجرته مهجوره
دنيايه صارت مظلمه من بعد عيناك
والدهر بعد عماني وبسهم فقدك رماني
يبني من ببعدك أظل محتاره
اعيش ويا افكاري مالي جاره
من يطر البدر نوره صورتك بيها اشوفه
ومن يشع النجم يبني بالسمه مثلك اوصوفه
يبني واذكر ايامك وترباتك ابن سنتين
اتذكرها بسماتك وخطواتك ينور العين
ويمه من تناديني قلبي ينشطر شطرين
شطر يمك يلوح اعليك وشطرهم ينشطر نصين
عشت يبني وشوفتك تسعدني
لليوم من اذكرك يدمع جفني
بالطف تركت اقليبي يوليدي يرعاك
وانته قلبي ومالي ثاني وبسهم فقدكر رماني
31/3/2001 م 5محرم 1422هـ